ქართული ტყის სტუმრები

მსოფლიოში ცნობილი სამაუწყებლო კომპანია, „დოიჩე ველე“ ჩვენს ტყეს ეწვია და ასეთი ვიდეომასალა მოამზადა.

ნახეთ ვიდეო: A New Forest for Georgia | Global 3000

Advertisements

აგვისტო 1, 2010 at 5:18 PM დატოვე კომენტარი

საჰაერო გზებით მოპარული ხეები

ხვალ ტყეში მივდივარ, იმედია, ხეები ადგილზე დამხვდება! ისეთი კატასტროფული სისწრაფით ჩეხავენ, არც უნდა გამიკვირდეს, რომ კუნძების „ტყე“ დამხვდეს. დღეს ოფიციალურად შეგვატყობინეს, რომ ვიღაცებმა ტყის ხარჯზე მაგრად იხეირეს, სამაგიეროდ, სხვა დანარჩენები ასევე მაგრად დავზარალდით. გარემოს დაცვის სამინისტრო მგონი, ფინანსთა სამინისტროს ბაძავს, მხოლოდ ფულის თვლითაა დაკავებული. გარემოს დაცვის ინსპექციისა და სატყეო დეპარტამენტის უფროსებმა „გვახარეს“, რომ კახეთის რეგიონში კანონი დაირღვა და გარემოს 700 000-მდე ლარის ზიანი მიადგა. tree სატყეო და ლიცენზიით გაცემულ უბნებზე სამინისტრომ ინსპექტირება ჩაატარა და თელავის მეათე სარეინჯეროს შემოწმების შედეგად მნიშვნელოვანი დანაკარგი გამოავლინა.  რა დანაკარგზეა საუბარი? 3 211 ძირი ფოთლოვანი ხე უკანონოდ მოჭრილი აღმოჩნდა. კოლეგებს თელავის მეცხრე სარეინჯეროს თანამშრომლებმაც მიბაძეს და მათაც ათასობით ხე გამოზიდეს ტყიდან.  სამინისტროში კი აცხადებენ, რომ  თელავის სატყეო უბნის ორი რეინჯერია სამსახურიდან გათავისუფლებული, მათ საქმეებს სამართადამცავები სწავლობენ, მაგრამ აქამდე სად იყვნენ?

„მინდა ყველა რეინჯერი გავაფრთხილო,  გარემოს დაცვის სისტემაში მიმდინარე რეფორმები ვეღარ აიტანს უგულისყურო რეინჯერებს. მკაცრი კონტროლი გაგრძელდება, ჩვენ ერთი წუთით არ ვაპირებთ ყურადღების მოდუნებას. თითოეულმა მათგანმა უნდა დაიცვას ტყის ის ფართობი, რომელიც ჩააბარა სახელმწიფომ”, – განაცხადა სატყეო დეპარტამენტის თავმჯდომარე პაპუნა ხაჩიძემ.

პაპუნა ხაჩიძისა და მისი უწყების თანამშრომლებთან ერთად, სხვა სამართალდამცავებსაც მივმართავ: დიდი ბოდიში, მაგრამ ეს ათასობით მორი რომ იჭრებოდა, საჰაერო გზებით გადიოდა გასაყიდად, თუ რაშია საქმე? კარგად გამოიძიეთ ბატონებო, სანამ ათასობით ხეს მოჭრიან, იქამდე მიხედეთ (აკი, ამბობთ, ყურადღების მოდუნებას არ ვაპირებთო. ესაა თქვენი ყურადღება?), თორემ ისეთი შთაბეჭდილება იქმნება, რომ ჩვენს ტყეებს უჩინმაჩინები არიან შესეულები და იქაურობას ჩუმად ანადგურებენ!

ივლისი 10, 2010 at 5:35 PM 1 comment

რას გვიშველის აქტი, მომხდარია ფაქტი!

რა ხდება გლდანი–ნაძალადევის რაიონში, უნდათ იქაურობა უდაბნოს დაამსგავსონ? გურამიშვილის გამზირზე პარკის გაჩეხვაზე უკვე ვწერდი, ახლა ნაჯახიან კაცებს თბილისის ზღვისაკენ გადაუნაცვლებიათ.

„მწვანე გაზეთის“ ინფორმაციით, თემქის სარეკრეაციო ზონაში, პლაჟზე ჩამავალ ფერდობებზე ადგილობრივები მოჭრილ ხეებს პოულობენ. კაცი ამ ადგილზე ხეს მოჭრის?

„ზოგჯერ ხეები მოჭრილი და გატანილია, ახლად მოჭრილი მორების გარდა, მანქანის კვალიცაა დარჩენილი. ზოგჯერ ხეები გატანილიც არაა“, – აცხადებს გეოგრაფი ნინო ლომიძე.

ამ საკითხთან დაკავშირებით, CENN გარემოს დაცვის სამინისტროს დაუკავშირდა. სამინისტროს პრესსამსახურის ინფორმაციით, ამ საკითხს გარემოს დაცვის ინსპექცია ადგილზე შეისწავლის და აქტსაც შეადგენს. დიდი შეღავათია! რას გვიშველის აქტი, მომხდარია ფაქტი!

გლდანი–ნაძალადევის გამგეობიდან მოწოდებული ინფორმაციით, ხეების მოჭრაზე ოფიციალური ნებართვა გაცემული არ არის.

„ინფორმაცია კომპეტენტურ პირთან გადავამოწმე. ხეების მოჭრაზე ნებართვის მოთხოვნით გამგეობისთვის არავის მოუმართავს“, – ამბობს სანზონის საუბნო სამსახურის უფროსის მოადგილე პაატა მიქანაძე.

ასეა, ვისაც ხის მოჭრა უნდა, ყველა ნებართვის ასაღებად კი არ გარბის? სანამ ხეს მოჭრიან, იქამდე უნდა შეაჩერო ნაჯახიანი კაცები, თორემ გადაჩეხეს ყველაფერი!

ივლისი 9, 2010 at 12:01 PM დატოვე კომენტარი

ზუგდიდელები ქალაქში ხეების გაჩეხვას აპროტესტებენ

ამ სტატიას გვერდს ნამდვილად ვერ ავუვლიდი. სტატიის ავტორი ჩემი კოლეგა, ინგა გვასალიაა და ის humanrights.ge–ზე გამოქვეყნდა.

რამდენიმე  კვირაა,  ზუგდიდში ხეების მასობრივი გაჩეხვა დაიწყო, რამაც საზოგადოებისა და პოლიტიკური პარტიების მწვავე პროტესტი გამოიწვია.

თავის დროზე ლევან დადიანმა ზუგდიდში იშვიათი ჯიშის ხეები დარგო.  სამეგრელოს დედოფალმა, ალექსანდრე ჭავჭავაძის ასულმა ეკატერინემ  საფრანგეთიდან ჩამოტანილი ნერგებით გააშენა უმშვენიერესი ბაღი, რომელიც დღემდე ზუგდიდელების სიამაყეა. დღეისთვის ეს სიამაყე საფრთხის წინაშეა – ბაღში არსებული ათობით ასწლოვანი ხე ორიოდე წლის წინ მუნიციპალიტეტის გამგეობის ბრძანებით გაიჩეხა და მის ნაცვლად უცხოეთიდან ჩამოტანილი ძვირადღირებული ნერგები დარგეს.

„კონსერვატიული პარტიის“ ზუგდიდის რაიონული ბიურო გამგეობის წამოწყებას ეწინააღმდეგება. მოძრაობის ადგილობრივი ლიდერი კობა ვაზგანავა ამბობს, რომ ხელისუფლება დადიანისეული ბაღის გაჩეხვას და ტერიტორიაზე სასტუმროს აშენებას გეგმავს.

„ხეების გაჩეხვა ვანდალიზმია. ისინი წლებია, ამშვენებენ ქალაქს. მათ ნაცვლად კი უცხოეთიდან ჩამოიტანეს პატარა ბუჩქები და მას რგავენ. საბიუჯეტო თანხები იხარჯება ამ ნერგებში. ამ დროს, ჩვენს ქვეყანაში იზრდება ათასობით ჯიშის მცენარე. მიკვირს, რატომაა გამგეობა დაინტერესებული, მაინცა და მაინც სხვა ქვეყანაში შეიძინოს ნარგავები. საქმე ისაა, რომ გამგეობას უნდა, მოჭრას ხეები, რათა უცხოეთში (არავინ იცის, ვის საკუთრებაში არსებულ კომპანიაში) 500 დოლარად იყიდოს თითო ნერგი. ეს ყველაფერი, შესაძლოა, ვიღაცის გამდიდრებას, ჯიბის გასქელებას ემსახურებოდეს. მინდა, მოგაწოდოთ ერთი საინტერესო ინფორმაციაც. როგორც შევიტყვეთ, იგეგმება ზუგდიდის დადიანისეული ბოტანიკური ბაღის გარკვეული ტერიტორიის გაჩეხვა და გამოთავისუფლებულ ადგილზე სასტუმროს აშენება. ზუგდიდის მოსახლეობამ არაფრით უნდა დაუშვას მსგავსი რამ“, – აცხადებს კობა ვაზგანავა.

საზოგადოებრივი მოძრაობა „დაიცავი საქართველოს“ ერთ–ერთმა ლიდერმა კახა მიქაიამ კი ქალაქის ცენტრში, ისტორიულ ბულვარში, ორ ყველაზე მაღალ ხეზე გაბმულ ჰამაკში შიმშილობის აქცია დაიწყო. იგი შიმშილობის დაწყების მიზეზად, ბულვარის გაჩეხვის თაობაზე გამგეობის მიერ მიღებულ გადაწყვეტილებას ასახელებს.  მიქაიამ და მისმა თანამოაზრეებმა მანამადე რაიონის მუნიციპალიტეტის გამგეობის შენობასთან საპროტესტო მანიფესტაცია გამართეს და მთავრობას ქალაქში 2 თვის წინ დაწყებული ხეების მასობრივი გაჩეხვის შეწყვეტა მოსთხოვეს.

ზუგდიდის მკვიდრი მარინა ბაძაღუა ამბობს: „გამგეობა მოსახლეობას ტოვებს ჰაერის გარეშე. ამოძირკვეს და მოჭრეს დიდი ხეები, რომლებიც არ იყო არც გამხმარი და არც რაიმე საფრთხეს ქმნიდა. იტალიიდან და გერმანიიდან ჩამოიტანეს დაფნის ძირები და მთელ ქალაქში რგავენ. პირველ რიგში წინააღმდეგი ვარ რაც ხდება, მაგრამ, თუკი ძველი ხეები მაინც მოჭრეს, ნერგები საქართველოში არ არსებობს? იტალიიდან რატომ უნდა შემოიტანონ?“

ზუგდიდის გამგეობაში ამ საკითხთან დაკავშირებით კომენტარს არ აკეთებენ. რაიონის მუნიციპალიტეტის პარტნიორმა, გამწვანების კომპანია შპს „კოლხი პეიზაჟის“ დირექტორმა ბესიკ ჭითანავამ კი გვითხრა, რომ ხეები მხოლოდ საზოგადოებისთვის საფრთხის აცილების მიზნით მოჭრეს. ხოლო იტალიიდან ერთი ნერგის ჩამოტანა (რომელიც მოჭრილ მარადმწვანე ხეებს ჩაანაცვლებს) სახელმწიფოს 32-დან 350 ევრომდე უჯდება: „მოჭრილი ხეები აზიანებდა სამანქანო ტრასას და მოსახლეობის სავალ ნაწილს. რამდენიმე თვის წინ, ძლიერი ქარის დროს, ერთი ასეთი ხე გადატყდა და ადამიანის სიცოცხლე შეიწირა. ამბობენ, თითქოს ჩვენ უცხოეთში ვყიდულობთ დაფნის ნერგებს. ეს დაფნა არ არის. ეს არის მარადმწვანე მუხა და ჩამოტანილია იტალიის ერთ–ერთი სანერგიდან, რომელსაც ჩვენ ვენდობით. მარადმწვანე მუხის ერთი ნერგი სახელმწიფოს 350 ევრო, ბუჩქები 32 ევრო, ხოლო ფიჭვი 45 ევრო უჯდება. ზუგდიდის რაიონის ბიუჯეტიდან ქალაქის გამწვანებისთვის გამოყოფილია წელიწადში 191 000 ლარი, სახელმწიფო ბიუჯეტიდან კი 197 000 ლარი. დარწმუნებული ვარ, 100 წლის შემდეგ ჩემს მიერ დარგული ხე არავის შეუქმნის პრობლემას“.

ქალაქის ცენტრში, გამგეობას რიგითი მოქალაქეებიც დაუპირისპირდნენ. იმ შემთხვევაში თუ საზოგადოებრივი მოძრაობის მოთხოვნა არ დაკმაყოფილდება, ზუგდიდელები მასშტაბური საპროტესტო აქციებით იმუქრებიან.

„ვუერთდები „დაიცავი საქართველოს“ მოთხოვნას. თუ კიდევ ერთი ძირი ხე მოიჭრება, არ ვაპატიებთ გამწვანების სამსახურს. უძველესი ხეები სამარცხვინო ნერგებით ჩაანაცვლეს. ყველა ზუგდიდელს მოვუწოდებ, შეეწინააღმდეგონ გამგეობის ამ საქციელს. ეს ალიკა ქობალია – ზუგდიდის გამგებელი, მთლად ნორმალური არ უნდა იყოს! აბა, საღად მოაზროვნე პიროვნება ასეთ გადაწყვეტილებას მიიღებს?!“ – აცხადებს დალი ლატარიამ. მას არც ჟურნალისტი კლარა აბრამია ჩამორჩა: „ეს ხეები ზუგდიდის ფილტვებია. თუ გაბედავს ხელისუფლება და  ბულვარის გაჩეხვასაც დაიწყებს, ხალხი უნდა აჯანყდეს. ადგილობრივი მთავრობა უსუსური და უუნაროა და ასრულებს ცენტრალური ხელისუფლების უგუნურ დავალებას“.

„დაიცავი საქართველოს“ ბრალდებებს ბესიკ ჭითანავა სერიოზულად არ აღიქვამს: „ყველა ჭორს არ დაუჯეროთ! ბულვარის გაჩეხვას არავინ აპირებს. მეგრელებისთვის დიდ ღირებულებას წარმოადგენს ბულვარი და ბოტანიკური ბაღი. თუ ეს ტერიტორია გავჩეხეთ, მაშინ რაღას დავტოვებთ ქალაქში?! სამუშაოები უკვე დასრულებულია. კეთილმოწყობის სამსახურმა მოჭრა დაზიანებული ხეები და მის ნაცვლად დავრგეთ იტალიური ნერგები. ეს იყო სულ მთელი ამბავი“.

ივლისი 1, 2010 at 12:08 PM 3 comments

ვანომ პარკი გაჩეხა, მერიასა და გამგეობაში ბოდავენ!

წარმოიდგინე, ქუჩაში მიდიხარ და ხედავ, რომ დედაქალაქის ერთ-ერთ ცენტრალურ გამზირზე პარკს მუშები შესევიან, ხეებს ჩეხავენ… თვალებს არ დაუჯერებ? რატომ? შენ მხოლოდ დედაქალაქის გამწვანების აქციების გჯერა, როცა ნერგებს მიწას მიაყრიან და კაბინეტებში ბრუნდებიან? ფაქტია, რომ  გურამიშვილის გამზირზე, პირდაპირ გლდანი-ნაძალადევის პოლიციის სამმართველოს წინ ნაძვები და ფიჭვები უმოწყალოდ გაკაფეს! ცხადია, პოლიციის შენობის წინ ამდენი ხალხი თავისი ინიციატივით არ მივიდოდა და პარკს არ გაჩეხავდა.ეს არ იყო პატარა სკვერი, ერთი ან ორი ხე კი არ მოუჭრიათ. ნარგავები საკაოდ დიდ ფართობზე გაანადგურეს. გაზაფხულობით ეს ადგილი იებით იფარებოდა და ხეებზე ციყვები დახტოდნენ, მაგრამ ციყვები ვის დაჰკარგვია, როცა საქმე გაცილებით „დიდ მიზნებს“ ეხება. ძალიან მნიშვნელოვანი დეტალი – ბოლო დროს, ჩვენი ხელისუფლების წარმომადგენლები ყველა არაპოპულარულ ნაბიჯს სიბნელეში, შუა ღამით დგამენ. ასე მოხდა ამ შემთხვევაშიც, ხეების გაჩეხვა ღამის საათებში დაიწყეს… თუმცა, თანმიმდევრულად მოგიყვებით.

ბუნებრიავია, დავინტერესდი, რატომ გაჩეხეს ხეები. მე რომ ჟურნალისტური წესების თანახმად, ინფორმაციის მისაღებად, რომელიმე უწყების პრესსამსახურისათვის დამერეკა, კარგა ხანს მომიწევდა ლოდინი, ამიტომაც, ინფორმაციის მოპოვების გაცილებით მარტივ ხერხს მივმართე. როცა ხედავ, ტყეს ჩეხავენ, პირველი რა გაგახსენდება? რა თქმა უნდა, გარემოს დაცვის სამინისტრო. ამიტომაც, ამ უწყების ცხელ ხაზზე დავრეკე, თუმცა ეს ცხელი ხაზია თუ ნდობის ტელეფონი, ვერ გავიგე. თითქოს შეშფოთდნენ (ევროპასავით) და ჩვენ რა, ჩვენ რა შუაში ვართ, ეგ ალბათ ქალაქის ხელისუფლების გადაწყვეტილებაა, იმათ მიმართეთო… ესე იგი, თბილისი გარემოს დაცვის სამინისტროს მმართველობაში არ შედის. ამ ლოგიკით, ყველა ქალაქს თავისი მმართველი ჰყავს, ყველა სოფელს – გამგებელი და მაშინ, გარემოს დავცის სამინისტრო რას აკეთებს?!

რადგანაც გარემოს დაცვის სამინისტრო გურამიშვილის გამზირს არ იცავს, მერიის ცხელ ხაზზე დავრეკე. მერიის ცხელი ხაზის ოპერატორმა გოგონამ მომისმინა და დაასკვნა, ეს თემა ზედამხედველოს საქაქალაქო სამსახურს ეხებოდა. ინფორმაციის მისაღებად, მათთან დამაკავშირა. თუმცა, როგორც ეტყობა, „ზედამხედველები“ ისე არიან ზედამხედველობით გართულები, რომ ძალიან იღლებიან და სამსახურში დღის პირველ ნახევარში არ ცხადდებიან. ფაქტია, მათთან ზარს არავინ უპასუხა. მეტი რა გზა იყო, მერიაში კიდევ ერთხელ დავრეკე, ახლა სხვა ოპერატორმა მიპასუხა და მასაც ავუხსენი, რომ გურამიშვილზე პარკს ჩეხავდნენ.

გოგონამ უცნაური კითხვა დამისვა: „ეს სკვერი ჩვენი გაკეთებულია?“ (სიტყვა „ჩვენი“ იცით როგორი ტონით თქვა? აი, იმ ადამიანის ტონით, წელთაღრიცხვა „ვარდების რევოლუციის“ შემდეგ რომ ეწყება). მას შევახსენე, რომ პარკი პარკია და არსებითი მნიშვნელობა არ აქვს, ვინ ამოჩიჩქნა მიწა ხის დასარგველად, მიშამ თუ გრიშამ… კიდევ კარგი, ოპერატორი დამეთანხმა და დამპირდა, ყველაფერს გაარკვევდა. ცოტა ხანში კარგად დალაგებული და ჩამოყალიბებული პასუხი მივიღე: თურმე, ამ პარკში მდგარი წიწვოვნების მტვერი სხვა ნარგავებს მტვერავდა, რაც არ შეიძლებოდა (ეს პასუხი კარგად დაიმახსოვრეთ!).

დავინტერესდი, ვისგან მიიღო მერიის ცხელი ხაზის ოპერატორმა ესოდენ ბრძნული განმარტება, საეჭვო იყო, საკმაოდ ჯანსაღ ნაძვებსა და ფიჭვებს რამე პრობლემა შეექმნათ, მით უმეტეს, რომ ეს გამოხშირვა კი არ იყო, არამედ, ხეები პირწმინდად გაკაფეს.

ოპერატორმა გამიმხილა, რომ ასე გლდანი-ნაძალადევის გამგეობაში დაკვალიანეს. მეც გამგეობას დავუკავშირდი. იქ ქალბატონმა მიპასუხა, რომელსაც როგორც კი გურამიშვილის გამზირი ვუხსენე, მაშინვე დაიძახა, იმაზე რეკავენო და ჩოჩქოლის ხმა მომესმა. ქალბატონმა, ახლავეო და… მგონი მთელმა გამგეობამ იმ ვერსიის დამუშავება დაიწყო, რომლითაც მათ თავიდან უნდა მოვეშორებინე. თუმცა, ტყუილიც კი არ ეხერხებათ – მერიაში თუ ყველაფერი მტვერს დააბრალეს, გამგეობაში ახალი ვერსია შემომთავაზეს. მოპასუხედ კვლავ ეს ქალბატონი აიჩიეს (ალბათ, მდივანი იყო) და მახარეს, რომ თურმე, ამ ტერიტორიაზე მიწისქვეშა კოლექტორია შესაკეთებელი, მის გასარემონტებლად ტექნიკა ვერ შედის და ხეების გაკაფვაა საჭირო.

რა უნდა იფიქრო, როცა 5 წუთში ჩვენება იცვლება? ესე იგი, იტყუებიან! მე ვინმე კომპეტენტურთან დაკავშირება მოვითხოვე და ჩემს თანამოსაუბრე ქალბატონს ძლივს გავაგებინე, რას ნიშნავს სიტყვა კომპეტენტური. როგორც იქნა, ხანგრძლივმა ახსნა-განმარტებამ შედეგი გამოიღო და აპარატის უფროსთან, ბესიკ არველაძესთან გასაუბრების პატივი მერგო. მდივანი ქალი აშკარად ამ კაცმა დაარიგა, მანაც ზუსტად იგივე პასუხი გამცა და თანაც, პასუხისმგებლობა რომ აერიდებინა, მითხრა,  ეს გადაწყვეტილება სპეციალურმა კომისიამ გამოიტანაო. ამ კომისიის წევრთან დაკავშირებაც მოვითხოვე და… აქ დაუშვეს ყველაზე დიდი შეცდომა –  კომისიის წარმომადგენელი ბეჟან ნონიკაშვილი გულწრფელი ადამიანი აღმოჩნდა. მან დამიდასტურა ინფორმაცია, რომ ხეები, რომელიც გაჩეხეს, სრულიად ჯანსაღი იყო, მანაც ისაუბრა იმაზე, რომ ამ ტერიტორიაზე კოლექტორი გადის, თუმცა, როდესაც ამ კოლექტორს მოაწესრიგებენ,  ხეებისაგან გაცარიელებულ ადგილას პოლიციის ახალი, გამჭვირვალე შენობა უნდა აშენდეს.

აი, რატომ იყო ეს საკითხი ასეთი გასაიდუმლოებული და რატომ შეთხზეს ათასი სისულელე. ბატონი ბეჟანისაგან ისიც შევიტყვე, რომ მათი კომისიის თამჯდომარე (ეს ის კომისიაა, რომელიც ავარიული ხეების მოჭრის საკითხს წყვეტს) გამგებლის მოადილე ვალერი ნინიკელაშვილია. ნინიკელაშვილი თურმე ამ ტერიტორიაზე ღამით მიიყვანეს და ხელიც მოაწერინეს ნებართვაზე, რომ პარკი გაჩეხილიყო.

ვალერი ნინიკელაშვილსაც დავუკავშირდი.  თავიდან მას არ გავუმხილე, რომ ვიცოდი, პარკს პოლიციის შენობა როგორ ამჯობინეს. ნინიკელაშვილმაც ძალიან დამაჯერებელი ტონით დამიწყო საუბარი იმაზე, რომ აქ კოლექტორი გადის, მისი შეკეთებაა საჭირო. თუმცა, კითხვაზე, თუ რა იქნება კოლექტორის შეკეთების მერე, გამგებლის მოადგილე „გაიჭედა“. ახლა მას პოლიციის შენობა ვუხსენე, ძალიან აღელდა. მან ეს კატეგორიულად უარყო. შევაპარე, რომ ეს ინფორმაცია მისივე კომისიის რიგითმა წარმომადგენელმა მომაწოდა, ამიტომაც სხვა ტაქტიკა აირჩია, ხეების გაჩეხვის ნებართვა კოლექტორის გამო გავეცი და პოლიციის ასაშენელად კი არაო. ძალიან სასაცილოდ ჟღერს, რომ გამგებლის მოდგილემ არ იცის ის, რაც იციან მისმა ქვეშევრდომებმა.

და მაინც, ხომ უნდა დამეზუსტებინა, მართლა აშენდება თუ არა აქ პატრულების ახალი, გამჭვირვალე შენობა? ამჯერად, თავად პოლიციას დავუკავშირდი და…  გლდანი-ნაძალადევის პოლიციის მთავარ სამმართველოში დამიდასტურეს ინფორმაცია, რომ მალე ახალ შენობაში გადავლენ, თან ისიც დაამატეს, რომ არაფრის გარკვევას აზრი არ აქვს, ოფიციალური დოკუმენტები წესრიგშია და ხეების გაჩეხვაც – კანონიერი. დოკუმენტებს რომ მოაწესრიგებდნენ, ამაში ეჭვიც არ მეპარება, ბოლოსდაბოლოს, აქ ხომ ვანოა მშენებელი, ის ვანო!

ივნისი 26, 2010 at 7:23 PM დატოვე კომენტარი

ციფრები აფრიკიდან

გატანილი გოლების რაოდენობა არაფერ შუაშია, უბრალოდ, რამდენიმე საინტერესო ციფრს გადავხედოთ, რომელიც აფრიკას კიდევ უფრო კარგად გაგვაცნობს!

  • აფრიკის მოსახლეობის 36% დღეში დოლარზე ნაკლები თანხით ცხოვრობს.
  • აფრიკის ყველაზე მაღალი წერტილი მთა კილიმანჯაროა, მისი სიმაღლე 19 340 ფუტი, ანუ, 5, 89 კმ-ა.
  • აფრიკის მოსახლეობა მთელი დედამიწის მოსახლეობის 14%-ია.
  • აფრიკაში 53 ქვეყანაა.
  • აფრიკის მოსახლეობის მხოლოდ 31%-ს აქვს საშუალო განათლება.
  • ყოფელი აფრიკელი ქალი, საშუალოდ, 6 შვილს აჩენს.
  • აფრიკელების 44% 15 წელზე ნაკლები ასაკისაა.
  • აფრიკა ყველაზე მრავალენოვანი კონტინენტია, აქ 1000-ზე მეტ ენაზე საუბრობენ.
  • ბავშვების სიკვდილიანობის მიზეზი უმეტესად (80%) მალარიაა.
  • აფრიკაში ნავთობის მარაგი 114 მილიარდი ბარელია.
  • აფრიკის კონტინენტი მოსახლეობის რაოდენობით მეორე ადგილზეა (900 000 000 ადამიანი).
  • აფრიკაში მსოფლიოს მიწისზედა მტკნარი წყლის მარაგის 6%-ია.
  • აფრიკის ყველაზე დიდი ტბის, ვიქტორიას ფართობი 26 828 კვადრატული მილი, ანუ 69 484 კვადრატული კილომეტრია.
  • აფრიკაში 80 სამხედრო გადატრიალება წარმატებით განხორციელდა.
  • მთლიანი შიდა პროდუქტი ერთ სულ მოსახლეზე 671 $-ია.
  • აფრიკაში ტელეფონის 53 მილიონი აბონანტია.
  • აფრიკაში 44,3 მილიონი ინტერნეტმომხმარებელია.
  • კონტინენტის სანაპირო ხაზი 16 100 მილი, ანუ 25 910 კილომეტრია.

ივნისი 20, 2010 at 11:11 AM დატოვე კომენტარი

გარემოს დაქცევის ინსპექცია

გარემოს დაცვის მინისტრ გოგა ხაჩიძეს, საკუთარი უწყების თანამშრომლების „კარგი მუშაობის“ გამო, ამდენი მიკროფონის თანხლებითა და შეშფოთებული სახით ეთერში გამოჩენა ძალიან ხშირად უწევს.

კონსტიტუციური უსაფრთხოების დეპარტამენტის თანამშრომლებმა სპეცოპერაცია ჩაატარეს და გარემოს დაცვის სამინისტროს რეგიონული ბიუროების თანამშრომლები დააკავეს.  სამართალდამცავებმა უწყების თანამშრომლებს ორგანიზებული დანაშაულებრივი ჯგუფი უწოდეს, ანუ პირდაპირ გვითხრეს, რომ გარემოს დაცვის ინსპექციაში ბანდიტები დანავარდობდნენ.

გარემოს დაცვის ინსპექციის აჭარის, დასავლეთ-ცენტრალური, სამეგრელო-ზემო სვანეთის ბიუროსა და მცხეთა-მთიანეთის სატყეო სამმართველოს თანამშრომლები ვინ იცის, რამდენი ხნის განმავლობაში ქრთამს იღებდნენ და ვინც ფულს გადაიხდიდა, ხე-ტყის გაჩეხვისა და გაყიდვის უფლებას უპრობლემოდ აძლევდნენ.

„დღევანდელმა დღემ აჩვენა, რომ გარემოს დაცვის ინსპექცია არის ის იშვიათი გამონაკლისი ქვეყანაში, სადაც მასობრივად არის კორუფციის ფაქტები, რაც საჭიროებს დროულად მოგვარებას. ჩვენ დაგეგმილი გვაქვს  მოკლევადიანი და გრძელვადიანი ქმედებები. დღესვე მივდივარ სამივე რეგიონში, სადაც ეს კანონდარღვევები გამოვლინდა. თანამდებობას დატოვებს ჩვენი რეგიონული უწყების ხელმძღვანელობა“ – განაცხადა გარემოს დაცვის ინსპექციის უფროსმა ლევან მხეიძემ.
გიორგი რუხაძეს, რამაზ ნემსაძეს, გელა ჩხაიძეს, როსტომ შარვაშიძეს, გოჩა დავითაძეს, დავით გორაძეს,  გოგი ბჟალავას, გიორგი ხუნჯგურუას, ზაზა დვალიშვილს, მამუკა ჭკადუასა და გოჩა ჯაბაშანურს 11 წლამდე თავისუფლების აღკვეთა ემუქრებათ. დიდი ხანია ამბობენ, რომ თანამშრომლების დაპატიმრების ტენდენციით ლიდერ მინისტრ გოგა ხაჩიძესაც მოუწევს პასუხისგება და მას მინიმუმ, მინისტრის პორტფელს ხელიდან გამოაცლიან… მაგრამ, ასეც რომ მოხდეს, რა ეშველება ქართულ ტყეს, რომელსაც გარემოს დამცვლელები კი არა, დამქცევები შესევიან.

ივნისი 14, 2010 at 8:44 PM 1 comment

ძველი პოსტები Newer Posts


ბოლო ჩანაწერები

Share/Bookmark

კალენდარი

სექტემბერი 2017
« ოქტ    
 123
45678910
11121314151617
18192021222324
252627282930  

ბლოგის სტატები

  • 9,072 ჰიტი
free counters